மரங்கள்

பசுமைரசம்

ததும்பும்

மரக்கிண்ணங்கள்

வசந்தகாலம்

தேர்தல்காலமா?

மரச்சுவர் எங்கும்

அ.தி.மு.க. சின்னங்கள் !

மரங்கள்

ஏழைப்பறவைகளின்

குடிசைகள் !

மரங்கள்தான்

உண்மையில் சிவன்கள்

நமக்கு

ஆக்ஸிஜன்

அமுதம் கிடைக்க

நச்சுக்காற்றை

புசிப்பதால்

மரங்கள்தான்

உண்மையில் சிவன்கள் !

உங்களுக்குத் தெரியுமா?

மரங்கள் மட்டுமே

பொதுவுடமையை

கடைபிடிக்கின்றன.

சூரியனை

பொதுவுடமையாக்கி

ஒளிச்சாப்பாட்டை

பகிர்ந்துண்பதால்

மரங்கள் மட்டுமே

பொதுவுடமையை

கடைபிடிக்கின்றன!

மரத்தகப்பன்கள்

இத்தனைப்

பூப்பெண்களைப்

பெற்றுவிட்டோமே

எனக் கவலைப்படுவதில்லை.

வண்டுகள் நம்

இளைஞர்களைப் போல்

வரதட்சணை

தண்டல்களில்

இறங்குவதில்லையே!

மரங்கள் மட்டுமே

பரம பக்தர்கள்

காலதேவனுக்கு

ஆண்டுக்கொருமுறை

மொட்டை அடித்து

கொள்கின்றனவே !

தண்ணீர்ப்பால்

கொடுத்த

தாய்ப்பாசம்

மறக்காதவை

மரங்கள் !

வெயில் காலத்தில்

நிலத்தாய்க்கு

நிழல் பந்தல் போடுகிறதே !

அதுசரி ...

அங்கே

மரப்பங்களாவில்

சருகு ஒட்டடை

அடிப்பது யார் ?

ஓ!

காற்றோ ?

- சுகன்

வெல்வேன் - கவிதை - சொல்வேன் !

எனக்குள்ளே பாடங்கள் படித்தாள் ! உயிர்த்திரி

எரிந்திடவே காதலைத்தான் வடித்தாள் ! - என்றன்

கனவுகளை நினைவுகளைக் களவாடிச் சென்றவளோ

கரும்பு - மணக்கும் - அரும்பு !

முற்றாத நாற்றாக உருவம் ! - காதல்

மின்சாரம் உருவாக்கும் பருவம் ! - என்னுள்

அற்புதங்கள் விளைக்கின்ற சின்னவளின் புன்னகையோ

மின்னல் - உதட்டின் - பின்னல் !

மல்லிமுல்லை மணமடிக்கும் தேகம் ! - அதரம்

மதுவூறும் பூவினிதழ் பாகம் ! - வெள்ளை

அல்லிமலர் செண்டாக ஆடுகின்ற இளவஞ்சி

அணைப்பு - நெஞ்ச - பிணைப்பு

இடையசைவில் கவியெழுதிச் செல்வாள் ! - காதல்

இருஉயிரின் வேதமெனச் சொல்வாள் ! - உதட்டு

மடைதிறந்தே முத்தவெள்ளம் என்னிடத்தில் கொட்டென்றேன்

சினந்தாள் - பொய் - சினத்தால் !

ஓடிசியேன ஆடுகிற விழிகள் ! - கள்ளை

ஒழுகவிடும் மன்மதனின் வழிகள் ! - சொல்லை

வெடியாக வீசுகின்ற வாலிபத்தின் புயலவளை

வெல்வேன் - கவிதை - சொல்வேன் !

கணினியாய் கவிபாடும் மேனி ! - இதயக்

கற்பூரம் ஏற்றுகின்ற ஞானி ! - இளமைத்

தம்புராவில் சுதிஎழுப்பி மதிமயக்கும் குளிர்மகளால்

தவிப்பு - உயிரில் - தகிப்பு !

நான்பயிலும் கீர்த்தனையே வாநீ! - இரத்த

நாளத்தில் அசைகின்ற தோணி ! - இரவின்

தேன்கனவில் நடமாடி என்னுறக்கப் பூவுதிர்க்கும்

காவியம் - புனையா - ஓவியம் !

- சுகன்

மார்கழி பூ

மார்கழி திங்களை அழகு செய்ய பல உண்டு. அதில் உன்னதமானது கோலம். அம்மா சுசிலா கோலம் போடுவதில் அபார ஞானம் உள்ளவர்கள்.

ஒரு சொர்கவாசல் திறப்புக்கு அம்மா போட்ட கோலம் புதுமையானது.

சொர்கவாசல் வைணவ தொடர்பானது.

அம்மா கோலத்தில் வைணவ குறியீடுகளோடு சிவ குறியீடுகளையும் சேர்த்து நல்லினக்க நோக்கோடு வாசலில் போட்ட கோலமிது.

படைப்புள்ளத்தின் இயல்பான கலகமும் இதில் வெளிப்படுகிறது. கண்ணார களியுங்கள்.

- சுகன்

திராவகக்கவிஞன்

இழிவு கொண்ட

மனிதர்களை

எச்சரிக்கை

செய்யவே

எழுந்து நிற்கும்

மீசையை

முகவரியாய்

வைத்திருந்தான்

முண்டாசுக்கவிஞன்

பல

நூற்றாண்டுகள்

இருண்டுகிடந்த

தமிழ்க்கவிதை

உலகிற்கு

நவீன வெளிச்சம்

பாய்ச்சிய

மின்சாரக்கவிஞன்

தமிழ் எழுத்துகளை

பாரதி

கவிதையாய்

ஒருங்கினைத்த போது

அவை

ஆயுத மொழி பேசின

தமிழ்க்கவிதைக்கு

தீவிரவாதத்தை

கற்றுக்கொடுத்த

திராவகக்கவிஞன்

பிறந்த நாள்

11 -12 -

- சுகன்

வெளிச்சப் புள்ளிகள்

பகலின்

நெகடிவ்

இரவு !

மரம் பொறித்த

அப்பளங்கள்

அடடா சருகுகள் !

உதடுகளின்

சண்டை

உச்சரிப்பு...

மனசில்

மச்சம்

காதல் !

ஜனநாயகக்

காக்கையின் எச்சங்கள்

பாதையோர ஏழைகள் !

முட்களின்

சிநேகிதம்

இரத்த முத்தம் !

பயிரின் தலையில்

தங்கக் கொலுசு

நெற்கதிர்கள்

நிலம்

இருமுகிறது

பூகம்பம் !

மனதுக்கு மசக்கை

கவிதை மாங்காய்

தேடுகிறேன் !

தூக்க

வெளியில்

கனவு மேய்ச்சல் !

உயிருக்கு உயிர்

நீர்வார்க்கிறது

இரத்ததானம் !

பகலின்

தாலி

சூரியன்

வசந்தக்

சுவடுகள்

அவளின் கண்கள்

செடி சூரியனோடு

வியாபாரம் செய்கிறது

ஒளிச்சேர்க்கை

பூமியை

அரைப்பது யார்?

புழுதி !

தேர்தல்

எச்சம்

சுட்டு விரலில் மை !

- சுகன்

கவிமாமணி வெற்றிப்பேரொளி

கவிமாமணி வெற்றிப்பேரொளி

1980௦ களின் மத்தியில் கவிதை எழுத வந்தவர் வெற்றிப்பெரொளி. மரபு. புதிது. ஹைக்கூ என எழுதி தனக்கென்று தனி முத்திரை பதித்தவர். அறுபது வயதை நெருங்கும் கவிஞர் என்று சொல்லி விடமுடியது. உள்ளத்திலும், உடலிலும் இளமையாய் இன்றும் இயங்குவது அவரின் தனிச்சிறப்பு. தன் வீட்டிற்கு "கவிதை" என்று பெயர் வைத்திருக்கிறார்.

1991 - இவரது முதல் கவிதைத் தொகுப்பு "கருப்புநெருப்பு" உவமைக்கவிஞர் சுரதா, இன்றைய வணிகவரித்துறை அமைச்சர் இலக்கியக்காவலர் சி.நா.மீ.உபயதுல்லா அவர்கள் போன்றோர் நிறைந்த அவையில் தஞ்சையில் வெளியிடப்பட்டது. அந்தக் காட்சி நிழற்படமாய் இதோ.

சுகன் தொடங்கப்பட்ட 1987 இல் இருந்து இன்று வரை சுகனில் அவர் எழுதிய கவிதைகள் ஒரு தொகுப்பாய் விரைவில் வரப்போகிறது.

இன்றைக்கு எழுதிக்கொண்டிருக்கிற கவிஞர்களின் தரப்பட்டியல் ஒன்று தயாரித்தால் அதில் நிச்சயம் வெற்றிக்கு இடம் உண்டு.

கலைஞர் மு.கருணாநிதி அவர்கள் கையால் கவிமாமணி விருது பெற்றவர். மாநில அரசின் "நல்லாசிரியர்" விருது பெற்றவர். தமிழத்தின் பல இடங்களில், பல அமைப்புகள் பல விருதுகளை கொடுத்து வெற்றிக்கு சிறப்புகளை செய்திருக்கிறது.

தான் வாழும் திருக்குவளையில் "கவிதை வெளி" என்கிற அமைப்பை நடத்தி வருகிறார். அந்த அமைப்பின் சார்பாக அக்டோபர் மாதத்தில் சௌந்தரசுகன் இதழாய்வு கூட்டத்தை நடத்தினார். "பௌர்ணமி" என்கிற வட்ட வடிவ கையெழுத்து இதழை நடத்தியவர். தஞ்சை தமிழ்த்தாய் இலக்கிய அமைப்பின் தலைவராகவும், சுரதா தொடங்கிய உலக தமிழ் கவிஞர் பேரவையின் முக்கிய பொறுப்பிலும் இருக்கிறார்.

- சுகன்